Shan Khalad oo ay Dhallinyaradu Sameeyaan Iyo Sida Ay U Maareyn Karaan

Marxalladda ay da’yartu ku maraan korriimada iyo horumarka islamarkaana la soo baxayno xidido ku fidaya caro aan salkeedu fadhin oo saansaanta noloshana ay noqoneyso mid aan la saadaalin Karin mid togan amaba taban.

Sidoo kale waa marxalad qeexeysa dhabaha xirfadeed ee aan qaadi lahayn. Sidaas darteed waa inaan la khasaarin marxaladaas culeyskeeda iyo miisaankeeda leh, haddii lagu cayaarana cawaaqib ku keeni doonta mustaqbalka.

Maqaalkan waxaan hoosta kaga xariiqi doonaa qaar kamid ah khaladaadka ay dhallinyaradu galaan iyo sidii ay ugaga feejignaan karaan. Aan duducda usii dhaadhaaco.

1. Dhallinyaradu Waxay Dhaqaalahooda ku bixiyaan waxyaabo aan muhiim ahayn.

Tani waxay kamid tahay arrimaha ugu waawayn khaladaadka ay dhallinyaradu sameeyaan. Inta badan waxay jecel yihiin inay tamashleeyaan, kuna raaxeystaan nolosha isna tusiyaan asaaggood. Waxay ku deydaan kuwo ayaga la fac ah una tafaxeytaan inay sidooda oo kale u noolaadaan. Labidka casriga ah, gaari cad iyo waxyaabo faan u badan ayay ku xoolo beelaan.

Waxba kuma jabna in labis casri ah la qaato ama telefoonadii ugu dambeeyay la iibsado, laakiin waxaasi oo dhan ma noqon doonaan kuwo mustaqbalka faaiido u leh. Ka dhallinyaro ahaan ujeedkaaga iyo hiigsigaaga waa inay ku qotomaan sidii ay u samaysan lahayd keyd dhaqaale. Waxaa markaas habboon inaad barato sidii aad keyd u dhigan lahayd adigoo maalgashi caqli ku dhisan samaynaya.

Waad yeelan kartaa waxwalba aad ku hamiso, laakiin waa inay ahaataa mar aad heer isgaarsiisay. Waxaa arrintan marag u ah kuwa noloshooda heer gaarsiiyay lacago badana shaqeystay.

Waxba haku dayan saaxiib am acid kale, markaad dhaqaale ahaan isku filnaasho gaarto waxwalba waad samaysan kartaa. Nuxurku waa inaad garataa waxa hadda kuu muhiim ah, baahidaadana ay mudnaan kuu kala lahaataao.

2. Dhallinyaradu Waxay U maleeyaan haddiiba Wax La barto in la taajirayao.

Tani waa arrin dhab ah laakiin kuwo badan oo dhallinyarada kamid ah Ayaan rumeysnayn. Laga yaabee inaysan ku khaldanayn amaba laga yaabee in eeddu u wareegato hannaankeena waxbarasho. Waxbarasho keliya kuuma suuragelin karto inaad hesho hantida aad maanka ku hayso. Sidoo kale dugsiyada nalaguma soo barin sidii aan taajir ku noqon lahayn. Waa inaan garwaaqsanno in waxbarashada dhabta ahi ay ka bilaabato marka aan ka soo baxno xeyndaabyada Dusgiyada ama jaamacadaha. Waxbarashadu waa Hannaan meerto ah, Maalinwalba nolosha waxay ina bartaa duruus cusub.

Waxbarashada dhabta ahi waa ay ka duwan tahay mida jaamacadaha. Dadka nolosha ku guuleysta waa kuwa sii wata waxbarashadooda xitaa haddii ay 10 sano ka soo wareegato waqtigii ay dugsiyada ama jaamacadaha ka soo baxeen. Waxaa nasiib darro ah inta badan dhallinyaradu ay iska iloowaan imay sii wataan waxbarashada Kadin maalinta ay ka qalin jebiyaan iskuul/jaamacadda, taasoo u horseedda faqri, jahwareer iyo inaysan u rumoobin riyooyinkooda nolosha.

Waxaa wanaagsan inaad akhrisato buugaag kala duwan, inaad duruus dheeri ah ka qaadato aaladda Internetka ama dad kale aad wax ka barato. Waa inaad ogaataa in waxwalba aad ku hamineyso inaad gaarto waxaa jira dad kaaga horeeyay oo heerkaas hore usoo maray, dadkaas waa inaad wax ka barato. Waa inaad iska dhistaa dhanwalba oo nolosha ah si aad horumar u gaarto.

3. Dhallinyaradu Waa Kuwo Si Fudud Isku Dhiiba

Dhallinyaradu inta badan waxay la soo baxaan dabeecadda ah inay si fufu isku dhiibaan. Isdhiibaddu waa dilaaga rajada. Adkeysiguna waa rajada guusha. Qofna hal habeen qura kuma taajirin. Dadka nolosha ku guuleystay waxay soo mareen heerar kala duwan oo culeysyo iyo dhibaatooyinba lahaa, taasina waxay u suura gelisay inay hantaan guusha nolosha.

Nasiib darro dhallinyaro badan waxay ku fashilmaan inay sameeyaan ujeeddo ay hiigsadaan, waxayna isku dayaan inay si dhakhsi ah guul uga gaaraan nolosha, isku deygaas wuxuu ku keenaa tallaabooyin aan wanaagsanayn oo laga yaabo inay noloshooda ku galaafadaan. Tusaale haddii aan usoo qaato immisa dhallinyaro ah ayaa badda ku aafoobay ama naftooda ugu haligay? Ma gaareen rajadooda nolosha?

Waxaan habboo inaad ku socoto dhabo aad jeexatay islamarkaana u gegsato cawaaqib kasta oo kusoo waajahda, waxaa hubaal ah in ugu dambeyn aad guushaada gaari doonto.

4. Dhallinyaradu Waa Kuwo Iska Rumeysta Waxwalba oo ay Maqlaan

Waa inaan isla qirnaa inaysan noloshu ku jirin wadiiqo iska fudud ama sahlan. Dhallinyaradu waa kuwo u nuqul in la khaldo, waxay si fudud u aaminaan wixii ay maqlaan amaba looga sheekeeyo.  Dhallinyarada waxaa ka buuxa fikrado iyo maskax heerkeedu sareeyo, sidaasoo ay tahay waxaa si fudud afkaartooda ku bedeli kara dadka ayaga ka waawayn. Dhallinyaranimadu waa inay ahaataa marxalad waxbarasho. Waxwalba oo marxaladaas kula soo gudboonaato waxay kuu noqon doonaan khibrado mustaqbalka duruus kuu noqonaya.

5. Dhallinyaradu Waa Kuwo Maalgashi Ku Sameeya ayagoon Baaris Cilmiyeed Samayn.

Mararka qaar dhallinyaradu waxay ku dhacaan waxyaabo aysan fikrad, war iyo wacaalba haba yaraatee toona u lahayn. Waxayna taasi u sameeyaan ayagoo ku dayana jaalkooda kale iyo asxaabtooda uu horumar ka sameeyay afkaaro kale. Waxay Ku Guul darreystaan inay waqti iyo juhdi badan geliyaan si ay faham buuxa uga helaan tallaabooyinka ay qaadayaan.Waa inaad is weydiisaa su’aalahan: Maxaad Adigu Rabtaa? Maxaad Ku dooratay ama kugu kallifay? Sidee ayaad Ku Gaari Karta Waxa aad hiigsaneyso?

Marka aad jawaabo waafi ah u hesho su’aalahan ayaa waxwalba kuu noqonayaan kuwo kuu hagaagay xalna aad u heleyso mas’alooyinka kaaga baahan inaad maareyso.

Ka dhallinyaro ahaan-Wiil ama Gabar- Waxwalba aad waqti iyo dhaqaale ku maalgelineyso, waa inaad u hurtaa waqti iyo juhdi ku bixisaa inaad cilmi baaris qoto dheer ku sameyso kadibna aad ku howlgasho natiijooyinkoo kaaga soo baxay baaristaada cilmiyeed.

Soomaalida waxay ku maahmaahdaa Geedkii Orod Lagu Fuulo Orod Ayaa Looga Soo Degaa, taasoo micneheedu yahay in waxwalba u baahan yihiin ka baaraan degid kahor inta aan lagu dhaqaaqin. Hadii kale Natiijada kaaga soo baxaysaa waxay ku dhammaan doontaa guuldarro iyo fashil.  

Inaad Asxaabtaada Lasii wadaagtaa Waxba Kaama Dhibeyso anagana Waxay Inoo Tahay Dhiirigelin.

WQ: Nasra Siman