12 Cashar Ganacsi oo Laga Baran Karo Taxanaha Qasrigii Lacagta La Casa De Papel (Money Heist)

 

Qasrigii Lacagta (La Casa De Papel) waa taxane ama Musalsal Spanish ah oo ay malaayiin qof jeceleysteen daawashiida guud ahaan caalamka. 

Ka sokow inuu yahay film ka tarjumaya koox burcad ah oo lacago malaayiin ah ka dhacay Bankiga Spain, Haddana waa barnaamij laga baran karo sida fikrad aad ugu bedeli lahayd istiraatiijiyad iyo weliba sida aad fulin karto istiraatiijiyadda aad dejisay si aad uga guul gaarto hadaf.

Waa macquul haddiiba aad daawatay inaad duruus badan aad kala baxday.

Haddiise aadan weli daawan, waxaan halkan kuugu soo gudbinayaa 12 qodob oo muhiim ah waxna looga qaadan karo in lagu dabaqo nolosha.

1. Guushu Waxay U Baahan Tahay U Diyaargarow

Sida laga dheehan karay taxanaha, Barafasoorka oo ah maskaxda dhaqaajinaysay ama hagaysay kooxda burcadda wuxuu sameeyay waxwalba oo diyaargarow ah ee usuura gelin karay in qorshihiisu si guul leh ku dhamaado. Marwalba oo aad shaqo ama howl ganacsi ah aad bilaabeyso ku talagal in ay wadiiqo iyo caqabado badan kugu soo fool yeelan karaan, islamaarkan ka sii baaraandeg sidii aad ula tacaali lahayd caqabkasta.

2. Culayskasta Aad la Kulanto Wuxuu Kuu Dhoweynayaa Dhanka Guusha

Xalaqad kasta oo taxanaha kamid ah, Barfasoorka iyo kooxdiisa waxay la kulmayeen Caqabado halis badan. Si dhiifooni ah ayagoo u maareynaya caqab kasta ayaa ugu dambeyn u suura gelisay inay gaaraan yoolkii ay lahaayeen.

Marka howl ama ganacsi aad waday uu culays soo waajaho waxaad ogaaneysaa meesha dhibta ka jirto kadibna xalkeeda ayaad u dhaqaaqeysaa, sidaasna waxaad ugu sii durugtay gaaridda ujeedooyinkaaga. Culeysyada ha u arkin dhibaato, waxaad u fasiran kartaa fursado aad sixitaan iyo guulba ku gaari karto.

3. Isku Day fahamto Suuqa aad ku tartameyso si ka badan dadka Kale

Waxaan dhammaanteen in badan la yaabnay sida uu barfasoorku ula soo baxayay fikrado iyo istiraatiijiyado uu kaga hortagayay booliska kana dhigayay mid ka tallaabo dheereeya booliska. Ma ahan wax adag, keliya wuxuu aad u fahmay nidaamka kagana badiyay dad kale, wuxuu sii ogaa tallaabo kasta oo ay samayn doonaan kahor inta aysan ku dhaqaaqin.

Marka dhanka ganacsiga aan ka fiirino, Fahamka suuqa inaad dadka kaga dheereyso waa asaaska guusha. Waa inaad isweydiisaa jawaabna u heshaa su’aalahan:

Waa ayo dadka aad rabto inay macaamiishaada noqdaan? Maxay ku doorbidi doonaan amaba ku diidi doonaan inay macaamiil kuu noqdaan? Hadii uu khalad ganacsi dhaco side ku maarayn doontaa?

4. Muhiimadda Suuq Baaristu Leedahay (Research)

Si aad u hesho xogo dhammeystiran waa inaad baaris durugsan ku sameysaa suuqa. Waa inaad warbixin buuxda ka heshaa suuqa aad dooneyso inaad ku tartanto.

Helidda xogahaas waxay kuu fududeyneysaa qaadashada go’aamada waxaana noqoneysaa qof u diyaarsan waxwalba uu suuragal ah oo suuqa kaaga imaan kara.

Soomaalida waxay tiraahdaa “War Helaa Talo Hela”.  Go’aan sax ma qaadan kartid adigoo aan war sugan haysan.

5. Baro Waxyaabaha Aad Ku Fiican Tahay

Barfasoorku wuxuu mar ka qalqalay inuu dilo hooyada dhashay askariyaddii u xilsaarnayd barista kiiskiisa. Bal kasoo qaad Oslo oo haysta Hub iyo Sun ma isleedahay daqiiqad xataa wuu qalqali lahaa? Waa Maya jawaabta.

Barfasoorka waxa uu ogaa in uu ku fiican yahay awoodna u leeyahay inuu kooxda gadaal ka istaago korna ka maamulo. Howlaha uusan ku fiicnayn oo dhan wuxuu u samaystay dad kale oo usoo fuliya.

Ganacsiguna waa sidaas oo kale, Naftaada haku khasbin waxyaabaha aadan awoodda u lahayn, taas bedelkeeda waxaad diiradda saartaa waxyaabaha aad ku wanaagsan tahay awoodna u leedahay.

6. Qorshe Sameyso

Hadaf aan lahayn qorshe waa iska riyo. Makula tahay in barfasoorka iyo kooxdiisa inta ay bankiga galeen, maxaabiis qabsadeen, booliska iska maareeyeen ayagoon wax dhibaato ah samaynin haddana la soo tagay malaayiin iyagoo aan wax qorshe ah samaysan?

Waxaa hubaal in la qaqaban lahaa xitaa ayagoon telefoon u dirin Barfasoorka.

Haddii aad yool u samaysato Ganacsigaaga, waa inaad diyaarsataa qorshe cad oo leh wadiiqooyinka aad mari lahayd si aad u gaarto hadafkaaga.

7. Qorshahaaga Ha Baalmarin

Way fududahay inaad la kulanto waxyaabo kaa weecinaya qorshahaaga, Sida Tokyo iyo kuwa kaleba ay sameeyeen. Daldalooladaasi waxay gaareen ilaa heer uu qorshihii oo dhami kusigto in uu burburo.

Marka aad qorshe u sameysato ganacsigaaga sidaas oo kale ayaa waxyaabo yaryar kugu keeni karaan inaad dhabaha ka leexato. Waxaa muhiim ah inaadan marna baalmarin qorshahaaga waxkasta oo kusoo waajaha.

8. Khaladaad Ayaad Ku Kacaysaa

Waxaa laga yaaba inaad qaadato go’aanno saamayn xun ku yeelan doona ganacsigaaga. Haddii aan taxanaha dib u milicsano Barfasoorka iyo kooxdiisuba waxay ku kaceen khaladaad badan. Laakiin waa la sixi karaa khaladaadka kaa dhaca sidoo kale duruus ayaad ka baran kartaa khaladaadka.

9. Far Keliya Fool Ma Dhaqdo

Bal qiyaas Barfasoorka oo keligiisa qorshenaya dhaca Bankiga asagoo waxwalba oo shaq ah. Maxaa dhici lahaa ayaad isleedahay?

Barfasoorku keligiis ma ahayn. Wuxuu raadiyay koox dad ah oo wadaag aragti la ah si uu qorshihiisa ugu hirgalo. Mararka qaar waa inaadan keligaa howlgalin oo raadsato dad khibrad u leh ganacsigaaga howshana kula fuliya.

10. Hankaaga Lacag Yuu Ku Koobnaan

Inkasta oo lacagtu tahay furaha dhaqaajiya ganacsiga haddana hankaaga waa inuu intaas ka sareeyaa haddii kale lacag keliya farxad iyo qaneeco ma keento.

Barfasoorku damaciisa mahayn lacag keliya ee wuxuu rabay inuu ka mira dhaliyo riyadii qabyada ahayd eek a tagay aabihiisa ka geeriyooday.

11. Nafhurid (Bella Ciao)

Mararka qaar waa inaad nafhurid sameysaa si danta guud loo gaaro. Waxaad macsalaameyn doontaa waxyaabo aad jeclayd. Qof  xun ayaa ganacsi wadaag kula noqon kara. Waqti qiimo badan kuugu fadhiya intuba waxaad u hureysaa sidii aad guul u gaarti lahayd.

12. Fikrad Yar Ayaa Saamayn Wayn Yeelan Karta

Markii la diyaarinayay Taxanaha Qasrigii Lacagta (Lacassa De Papel) marna lama fileyn inuu gaari doono heer caalami ah, keliya wuxuu ahaa mid loogu talagalay dalka Spain. Markii la arkay saamayntii uu yeeshay Qaybta koowaad ayaa maalgelin wayn ka helay Shirkadda Filimada ee Netflix taasoo gaarsiisay heer adduunka oo dhan laga daawado aadna loo wada jeclaystay.  

Haddii aad ka heshay maqaalkan Share-gareey.

Su’aal: Adigu Ma Daawatay Musalsalka Money Heist ama Lacassa De Papel? Maxaad ka baratay hal iyo Laba Ka deh?

Sidoo Kale Akhri: Shan Khalad oo ay Dhallinyaradu Sameeyaan Iyo Sida Ay U Maareyn Karaan

WQ: Nasra Siman